fbpx
Select Page
Gróffóðurkeppni Yara á Íslandi 2018 – Úrslit!

Gróffóðurkeppni Yara á Íslandi 2018 – Úrslit!

Íslenskur búskapur snýr að stærstum hluta um gróffóðuröflun.  Það má beita ýmsum aðferðum við að meta gæði gróffóðurs en almennt má segja að vega þurfi saman uppskerumagn og efnainnihald gróffóðursins.  Síðan má ekki gleyma því að horfa þarf til kostnaðar við gróffóðuröflun.

Yara á Íslandi stendur nú annað árið í röð fyrir gróffóðurkeppni.  Markmið keppninnar er að vekja athygli á þeim fjölmörgu þáttum sem þarf að taka tillit til þegar gæði gróffóðurs eru skoðuð og ekki síður að hampa þeim bændum sem standa sig vel.  Með þessari keppni viljum við líka undirstrika mikilvægi þess að láta greina heysýni og ekki síður að bændur meti uppskeru túna með markvissari hætti t.d. með því að vigta rúllur.

Til að meta gæði gróffóður þarf að greina efnainnihald og ekki síður að hafa upplýsingar um þunga á rúllum.

Að þessu sinni voru 6 þátttakendur í keppninni.

  • Egilsstaðabúið á Héraði
  • Stekkjarflatir í Eyjafirði
  • Goðdalir í Skagafirði
  • Skálpastaðir í Borgarfirði
  • Lækur í Flóa
  • Egilsstaðakot í Flóa

Við viljum þakka kærlega þeim bændum sem tóku þátt þetta árið.  Jafnframt viljum við þakka Efnagreiningu ehf kærlega fyrir þeirra lipru og góðu þjónustu þegar kemur að greiningu á sýnum.  Það er mikill styrkur fyrir íslenskan landbúnað að hafa slíka þjónustu hér á landi.

Það er ekki einfalt að dæma svona keppni og taka verður tillit til fjölmargra þátta.  Alls eru gefin stig fyrir 12 ólík atriði.  Uppskerumagn skiptir miklu máli en ekki síður að efnainnihald sé innan þeirra marka sem sóst er eftir.

Sigurvegarar Gróffóðurkeppni Yara á Íslandi 2018

Ábúendur á Stekkjarflötum, Hulda Sigurðardóttir og Ágúst Ásgrímsson

Þetta árið voru það ábúendur á Stekkjarflötum, þau Hulda og Ágúst, sem stóðu uppi sem sigurvegarar!  Við óskum þeim til hamingju með glæsilegan árangur.

Að Stekkjarflötum er rekið kúabú og er gróffóður er ræktað á um 100 ha.
Markmið hvers árs er að ná góðum heyjum með lágmarks notkun á tilbúnum áburði.  Fóður er verkað í rúllur og reynt er að forþurrka upp undir 60-70%.
Mikið er lagt upp úr því að gera áburðaráætlun fyrir hverja spildu og reynt er að nýta búfjáráburð sem best og fá sem besta nýtingu á tilbúnum áburði.
Búfjáráburður er borinn  jafnt á allt ræktunarland.  Mikið er lagt upp úr því að styrkur kalís í fóðri verði ekki of hár.

Á hverju ári eru ræktaðir um 6-9 ha af korni og er það yfirleitt ræktað í 3 ár og vallarfoxgrasi skjólsáð með byggi á 4 ári.  Gjarnan er sáð hreinu vallarfoxgrasi.
Hluti af byggökrum eru slegnir í grænfóður um skrið og kúnum beitt á endurvöxtinn.  Heildar uppskera hjá þeim var 8.566 kg þe/ha.  Uppskera var tekin í tveimur sláttum í fyrri slætti var uppskera 6.121 kg þe/ha og í seinni slætti 2.425 kg þe/ha.  Þess má geta að ekki var borinn á tilbúinn áburður milli slátta vegna þess að komin var næg uppskera eftir fyrsta slátt.  Þrátt fyrir það fékkst góð uppskera bæði af magni og gæðum í seinni slátt.  Það er samspil mikillar uppskeru og jafns efnainnihald í gróffóðri sem skapar þennan góða árangur.

Þessum góða árangri má þakka mikilli natni við gerð áburðaráætlana fyrir hverja spildu, og ekki síður markvissri nýting á næringarefnum í búfjáráburði.

Submit a Comment

Netfang þitt verður ekki birt. Nauðsynlegir reitir eru merktir *

Afhending

Hér erum við

Hafa samband